المعهد الفنى الصحي العسكري (ذكور _ إناث)

المعهد فنى صحي عسكري (ذكور _ إناث) 
------------------------------------------------------------------------------
بيتم التقديم بعد الثانوية العامة علمي علوم فقط هو دلوقتى التقديم خلص طبعا بس هناخد نبذه عنه 

بتتخرجو برتبة رقيب وبتفضلو تترقو لحد ما تبقو ظباط ومده الدراسة سنتين 

وده طبعا يعتبر فرصه للبنات اللي عايزه تقدم حربيه بعد ثانوي بعد ما المعهد الفنى للتمريض العسكري قفل اللي كان بيخرجك ملازم ع طول بس ده بقا اول تخرجك مش بتبقى ظابط ده بعد ترقيات وسنين لولا ما تبقى ظابط 

الاختبارات كالآتي 

اولا : يوم سحب الملفات و يوم تسليم الملفات

السحب بيتم من مستشفى المعادي العسكري للبنات وللشباب بيبقى من مستشفى كوبري القبه

بتاخدو معاكم الاتي :

150 جنيه تمن الملف

شهادة الميلاد والبطاقه

شهادة الثانوية العامة ودي أهم حاجة

المواعيد من 8 صباحا ل12 ظهرا

بعد كدا بتدخل جوا تستلمو الملف وهو ملف واحد ومعاه كارت التردد

طبعا هما مش بيصوروكم هناك ولا اي حاجة زي باقي الكليات العسكرية وبيحددولك فتره تسلم الملف فيها وخلاص ع كدا بتروحو

تاني يوم وهو تسليم الملف

بتاخد الملف كامل مفهوش طبعا حاجه ناقصه وهيقعد معاكم ظباط يراجعو الملف لو ف حاجة ناقصه بيكتبوهالك ف ورقه وتاخدها وتاخد ملفك وتروح تكمل الناقص وترجعلهم تاني بقا لما تخلصه ولو كان ملفك كامل بيكتبلك ف كارت التردد معاد الكشف الطبي وتاخد الكارت وتروح

يفضل سماع كلامهم وعدم الاستظراف وافتعال المشاكل والفون يتعمل صاااامت

ثانيا : الكشف الطبي

هو هو نفس كشف البنات بيكون للشباب بس ف اختلافات بسيطه بالنسبة للنظام بس واحنا ف البوست ده هنتكلم عن البنات مش تفرقه عنصرية ولا حاجه بس الشباب عادي هتقلها أقلع هتقلع إنما البنات محتاجين يتوضحلهم شويه وبردو هيقلعو مفيش حد مش هيقلع 

الكشوفات كالآتي

1. - رسم القلب
2. - اشعه
3. - اسنان
4. - رمد
5. - انف وأذن وحنجره
6. - جلديه
7. - عظام
8. - جرااحه
9. - سونار
10. - نسا

اللي بيتم كالآتي

اول حاجه بالنسبه لرسم القلب بيدخلوكي ف اوضه الاوضه دي ف مكان فيها ف ستاره بتروحي وراها بتقلعي كل هدومك اللي من فوق اه بتقلعيها كلها مش بتسيبي حاجه وبتخليكي بالبنطلون بس وبتلبسي جاون وبعدها بتروحي تعملي رسم القلب ولازم متبقيش لابسه حلق واي اكسسوارات وكلو بتخلعيه وبعد ما بتخلصي رسم القلب بترجعي ورا الستاره تلبسي هدومك من تاني

وبعد كدا بتروحي للأشعة عادي هما هيقلولك تعملي ايه بالظبط وهو جهاز هتقفي قدامه بيصورك وبس

بعد كدا بيودوكم ف اوضه بتغيري هدومك كلها بتقلعي كل حاجه كل حاجه بدون استثناء وبتلبسي جاون وبتقعدي بشعرك وبتلبسي ف رجلك أوفر شوز يعني كيس بالعاميه

وبتتقسمو مجموعات وبتلفو بقا ع العيادات كلها

وبعد ما تخلصي بتروحي تلبسي هدومك

وع فكره كشف النسا علشان يشوفوكي بنت ولا مدام يعني متجليش واحده تقولي عادي المتجوزين يقدمو والهري ده المتجوزين ف شرطه تخصصات وبس غير كدا لا

وبعد ما تخلصي بيحددولك معاد تروحي فيه علشان تعرفي نتيجتك

كشف السمات والقدرات والنفسي كلهم ف نفس اليوم

طبعا بعد ما بتخلص الطبي بيحددولك يوم تروح تعرف النتيجة ولو نجحت بيعطوك ورقه فيها حجات مطلوبه منك تجيبها ف كشف السمات

بالنسبة للبنات بيكون كشفهم ف مستشفى الماظه الكيلو 4ونص وتقريبا الشباب كدا بس هنعرف لما يفتح التقديم تاني ويقولو ع المكان

اللي بيحصل ف اليوم ده كالآتي

1_ بيراجعو الورق اللي كان مطلوب منك

2_بيصوروكم

3_بتتقسمو مجموعات

4_بعد كدا بيكون ف حاجة اسمها مقابله شخصية شبه الهيئة بالظبط يعني مثلا بيسئلوكم اسمك ايه سنك مجموعك اسأله من النوعيه دي بالنسبة للبنات بيكون زي كدا بردو بس بتبقى ظابط بنت اللي بتعمل معاكي كدا وبتخليكي تقلعي طرحتك لازم وتشوف أيديكم وكدا

5_بعد كدا ف حاجه اسمها تذكر

ودي بتبقى عباره عن انكم بتقعدو ف مكان نظام الفصل كدا وكل واحد ليه دسك لوحده وبيدوكم ورقه فيها قطعه القطعه دي بيبقى ناقص منها كلمات بتقعد تحفظ ف القطعه دي بسرعه وتركز ع مكان الكلمات الناقصة بعد كدا بيجيلكم ظابط يقرالك القطعه بالكلمات الناقصة وطبعا انتو بتكونو قالبين الورقه ع ضهرها وبعد ما بيخلص قرايه القطعه المفروض انت تكون عرفت الكلمات الناقصة وتكشف الورقه وتكمل الناقص

6_ الطول والوزن بيقلعوكم الجزمه بس وبتتقاسو

7_بعد كدا ف جهاز بيكون فيه حوالي خمس دواير بيتفاوت وسعهم وانت تروح تمد ايدك بقلم وتدخل القلم بين الدواير دي بحيث القلم ميلمسش اي دايره وده علشان يشوفو مدى ثبات أعصابك

8_نيجي لآخر حاجه بيقعدوكم ع كومبيوتر بيكون عليه اربع مجموعات من الاساله وكل مجموعه ع حسب ف مجموعة بيكون 20 سؤال والتانيه30 سؤال والتالته 50 سؤال وهكذا المهم الاساله دي كلها لازم تجاوب عليها ف 12 دقيقه ولما يخلص الوقت الكومبيوتر بيفضل ع طول معاك

الاساله بتبقى عباره عن :

1. -  قواعد انجلش
2. - مواقف يعني مثلا هتعمل ايه ف موقف كذا كذا علشان يشوفك يعني انت شخص مسؤول ف حياتك الشخصية ولا بتتهرب من المسؤوليات وهكذا
3. - اسأله رياضيه
4. - أشكال هندسية

وكل الاساله دي بتبقى اختياري

وبس بعد كدا بيحددولك يوم تروح فيه تسأل عن نتيجتك وبعد كدا تروحو

كشف التحاليل بعد ما بتعرف نتيجة السمات بيعطوك ورقه فيها حجات مطلوبة منك بتروح تجهزها وبتروح ف اليوم اللي متحددلك علشان التحاليل وده مفيش أسهل منو بتحللو دم وبول وبيراجعو الورق معاكم وبس وبيتحددلكم يوم تعرفو فيه النتيجه

بعد ما بتنجحو بتروحو هيئه بقا

ودي لازم لبسكم يكون مكوي وشيك ومحترم بنات وشباب للبنات مش بيتحدد لون معين بس الأفضل بلاش الألوان الفاقعه دي اللي توتر

قبل ما تدخل الهيئه ف ظباط برا بيقولوكم هتقولو ايه جوا

اسمك وسنك وعنوانك ووظيفة الأب وعدد الاخوه

بتدخلو 20 طالب بتقفو صف جمب بعض واللي عليه الدور يتكلم بيتقدم خطوه يعرف نفسه ويرجع ورا تاني ولو حد سألك سؤال إضافي تجاوبو طبعا وبعد كدا بيحددولك معاد تعرف نتيجتك وبعدها تستلم المهمات بتاعتكم والف الف مبروك 

بالشكل ده احنا مشينا معاكم خطوه بخطوه ف كل الاختبارات وبالتوفيق ان شاء الله